Полицијата во Дизелдорф уапси најмалку две лица по нападот со секира на главната железничка станица во градот. Според извештаите, неколку луѓе се повредени.
Има спротивставени извештаи за тоа дали полицијата трага по други осомничени.
Се претпоставува дека до пет лица се повредени во нападот, но засега нема детали за степенот на нивните повреди. Шпигел објави дека очевидци виделе луѓе како крварат на земја, но нема потврда од полицијата.
Рајнер Керстиенс, портпарол на федералната полиција за регионалната покраина Северна Рајна-Весфалија, го опиша нападот за Дојче веле како „напад на амок“. Градоначалникот на Дизелдорф, Томас Гајзел, наводно пристигнал на местото на настанот.
Федералната полиција на Твитер објави дека „шпекулациите нема да помогнат“ и рече дека полицијата во Дизелдорф ќе ја информира јавноста за тековната операција на главната станица.
„Тие само влегоа овде и ги нападнаа луѓето со секира. Видов многу работи во животот, но вакво нешто не сум видел. Само што почна да удира луѓе со секирата“, вели мажот. „Целата станица е полна со полицајци. Тоа е болно“.
На местото на настанот е распоредено големо полициско присуство, вклучително и специјални сили. Полициски хеликоптер кружи над областа, јавува RP Online. Железничката станица е затворена, а возовите се пренасочени од станицата додека полицијата се справува со инцидентот.
